رحلة أسبوع... 2

سيبنا نيويورك بأنوارها ومنظرها الجميل بالليل، وبدأنا الرحلة لباريس... الطيارة كانت إير فرانس، فكان من الطبيعي إن اللغة الأولى تكون الفرنسية، وإنت وحظك بأه لو مبتعرفش فرنساوي، لأنهم ساعات بيترجموا اللي بيتقال، بإنجليزي عدمان أوي، تفهم منه كلمة وعشرة لأ، وساعات بيطنشوا وميترجموش...، أنا قلت أديها فرصة الواحد يصحصح الفرنساوي بتاعه اللي نام من سنين طويلة، ده إن ماكانش مات... أول فرصة جاتلي، كانت من الراجل اللي كان قاعد جنبي... قاللي بالفرنساوي ما معناه الدنيا حر قوي موش كده؟... أنا فهمتها على طول، بس يظهر علشان الفرنساوي بتاعي كان مصدي أوي، لقيت نفسي بقوله تلقائيا
I'm sorry...?!
فالراجل فهم إني ما ليش في الفرنساوي (مع إني كنت أشطر واحد في الفرنساوي زمان) فترجم اللي كان عاوز يقوله لإنجليش مكسر شويتين، وكان زي مافهمت، فقلتله، أيوه الدنيا حر هنا... ، بعد شوية، المضيفة كانت بترحب بالركاب في الميكروفون بالفرنساوي طبعا، وغلطت وهيه بتتكلم، فرحت أنا ضاحك، لما ضحكت، الراجل اللي جنبي بصلي وراح ضاحك هو كمان، وكأنه كان عاوز يقولي منين إنت مفهمتنيش، ومنين فهمت هيه كانت بتقول إيه وكمان إكتشفت غلطتها...، ما علينا...، قضينا حوالي 7 ساعات في الطيارة، طبعنا أكلت ونمت وقمت ونمت وقمت وإتفرجت على شوية أفلام، وكل ما أحاول أتكلم فرنساوي، لساني يخوني ويقلب إنجليش... وصلنا باريس، وكان باقي على طيارتي التانية حوالي 45 دقيقة بس.... الطيارة بتاعتنا لوحدها أخدت 20 دقيقة منهم علشان تلاقي بوابة فاضية، في الأول ما كانش هاممني، بس لما لقيت إن العملية أخدت أكتر من اللازم بكتير، بدأت أقلق على إن الطيارة التانية تفوتني وتبقى مصيبة سودة بعيد عنكم جميعا...، ما علينا، باب الطيارة أخيرا إتفتح، بس كان قدامي ناس كتير قوي، وحتى لو حبيت أتقدم عليهم ما كانش هينفع لضيق المكان...، صبري كان فاضل فيه نقطة، ما علينا، خرجت أخيرا من الطيارة، وأخدتها جري، طيران على البوابة التانية، اللي كانت بعيدة قوي... إكتشفت بعد ما جريت أميال جوه المطار، إن الطيارة التانية هتتأخر ساعة، صبري كله رجعلي تاني، بس رجعلي محروق من الغيظ على سباق العدو مسافات طويلة اللي قطعته وقطع نفسي على الفاضي... وصلت للبوابة وقعدت أرتاح شوية لحد ما يبتدوا يعملوا بوردينج

To Be Continued...