السوبر زفت

الرحلة بين هنا وهناك طويلة ومرهقة وكل حاجة بس هيه كوم ومشوار مصر إسكندرية ده كوم تاني خالص... معنديش أبدا مشاكل في المشوار بين هنا وهناك... بس على طول بكون ناعي هم عذاب المشوار بين مصر وإسكندرية... كل مرة أنزل فيها، بفكر في كل السبل اللي توصلني إسكندرية، لكن في كل مرة، بيرسى بي الحال على المدعوء المهبب السوبر زفت، عفوا... أنا عارف إن إنتم بتسموه السوبر جيت، بس أنا لا شايفه لا سوبر ولا جيت نهائي... في كل مرة بستبعد فكرة التاكسي أو الليموزين نظرا لأني لا أثق في حاجات كتير، اللي منها: حالة العربية اللي هتدب المشوار ده، فممكن يقع نصيبي في عربية مهكعة تعطل في وسط الطريق... ثانيا السواق نفسه، لأن أنا عارف إن سواقين كتير في مصر مبرشمين، وما فيش داعي أدب خناقة مع سواق ممكن ببساطة يرميني أنا وشنطي في وسط الطريق... ثالثا، الطريق نفسه، اللي كل مرة أنزل فيها بشوف فيه البدع... إشي مجانين فاكرين نفسهم راكبين طيارة والطريق بتاع أهلهم، ,إشي ناس طار مخها وماشية في عكس الإتجاه، ,إشي ناس تانية ما عندهاش مخ من أساسه بتقطع الطريق بالعرض، وإشي مطبات الله يجازي اللي بيحطوها بمزاجهم من غير لا دراسة ولا مقاييس ولا يحزنون، وممكن تكسر أجدعها عربية لو السواق ماخدش باله منها... ومصايب تانية كتير... طبعا بعد التفكير فيها وفي كل اللي إتقال، فكرة تاكسي أو ليموزين دي بتنشطب تماما... بيتبقى القطر، اللي بحبه، لكني بكسل أخده في كل مرة، نظرا لأني أولا لا أعرف مواعيده، وثانيا علشان مشوار المطار التحرير وشيل الشنط والبهدلة، وثالثا بسبب سمعة القطارات عندنا... بيتبقى قدامي في النهاية وفي كل مرة السوبر زفت... فإلى أن أحكيلكم على آخر مغامراتي في هذا السوبر زفت، ده طبعا لو عاوزين تسمعوا