رحلة أسبوع... 3

قعدت في المطار في فرنسا أنتظر موعد الطيارة اللي رايحة مصر، وشاركني الإنتظار ناس كتير أوي، كانوا من جنسيات كتير جدا، وما كانش منهم مصريين كتير... كان منهم اللي بيقرأ كتب أو مجلات أو جرائد، ومنهم اللي بيشتغل على الكمبيوتر، واللي بيتكلم مع عيلته، واللي نايم، واللي بياكل، واللي بيتكلم في التليفون، اللي رايح جاي... المهم، جه ميعاد الركوب، ووقفنا كلنا طوابير، بعدها ركبنا... الطيارة قعدت مدة في إنتظار ناس كانوا متأخرين، بس لما الحكاية طولت زيادة عن اللزوم وبدأت الناس تزهق، أخد الطيار قراره إنه يسيب اللي ماجاش... وطار بينا... لقيت 3 كارسي جنب بعض فاضيين، رحت طبعا ناقل فيهم لوحدي، وبدأ مشوار باريس مصر... أكلت ونمت وقمت وإتفرجت على أفلام ولعبت من سيربح المليون، وأكلت و نمت وقمت إلى إن بدأ الإعلان عن إننا إقتربنا من القاهرة... قلبي فرح أوي، وأعتقد ده اللي بيحصل لكل اللي بيعيشوا بره مصر في كل مرة بيرجعولها... لما أصبحنا فوق القاهرة، بصيت من الشباك، كانت دي أول صدمة... كانت الشمس خلاص راحت والدنيا ضلمت... كنت بأتوقع منظر، موش هقول يجنن أو يخبل، لا، بس على الأقل يسر كل اللي بيشوفه، خاصة وإن كتير من اللي كانوا معايا على الطيارة، شافوا من ساعات منظر نيويورك بالليل اللي كان أكتر من يجنن وأكتر من ساحر... حاولت أحدد معالم أي حاجة معرفتش... البيوت والمباني بتدل على عشوائية رهيبة، سواء في الموقع أو في الحجم، الطرق معظمها مقدرتش أحدد له معالم، الأضواء، سواء أضواء البيوت أو المحلات أو السيارات، كانت بتشارك في تكوين الصورة العديمة الملامح للمدينة اللي شهدت عصور ماقبل الميلاد، وفيها ولد التاريخ... مكدبش عليكم، حزنت أوي
الناس في مطار القاهرة، كانوا في الحقيقة، مافيش أحسن من كده في المعاملة والزوق، سواء الجوازات أو الجمارك... طلعت من المطار متجها إلى "السوبر جيفت" فإلى أن ألقاكم في السوبر زفت 2، لكم تحياتي

To Bo Continued