السوبر جيفت 2

هذه تكملة ل:

رحلة إسبوع
و
السوبر زفت
و
رحلة إسبوع 2
و
رحلة إسبوع 3

جماعة معارف إقترحوا إنهم يوصلوني إلى محطة ألماظة، وقبلت ورحت معاهم بعدما أخبروني إن ده هيوفرلي ساعة كاملة... كان بداية الرحلة موش ولابد خالص، ففي جراج المطار وحده قضينا وقت طويل، نظرا لأن محدش في ذلك الجراج يعرف لكلمة نظام أي معنى. العربية تمت إحاطتها من الأمام ومن الخلف وعلى اليمين وعلى الشمال بعربيات تانية سابها صحابها متبعين سياسة: موش مهم أقف فين، المهم أقف وخلاص ويولع العالم وما فيه!
إضطرينا نزق العربيات اللي قفلت علينا الطريق، وتم تطليع العربية بسلام، لكن الحكاية ماكانتش سهلة بعد كده، إذ أن بوابة الخروج من الجراج، كانت بتستعملها عربيات كتير كبوابة دخول، وإنقلب بذلك طريق الخروج المؤدي للبوابة إلى طريق مسدود وقفت فيه العربيات مجموعتين وجها لوجه، مجموعة دخلت غلط وبالعافية، ومجموعة كل ذنبها إنها بتحاول إتباع الصحيح، ووقف بجوار المجموعتين مجموعة عساكر يتفرجوا بدلا من أن يحاولوا حل ذلك العك. الدم عندي بدأ يغلي ومعاه صبري كمان، كنت خلاص قربت أشيط، بس الحمد لله الراجل اللي كان سايق العربية نزل قبل ما صبري كله يتبخر، وزعق للعساكر اللي كانوا سبب المهزلة دي كلها، وبعدها بدقايق بدأت العربيات الغلط ترجع وبدأنا نتحرك.

نزلت في ألماظة وحزنت لمناظر الناس اللي شفتهم هناك... الناس شكلها مهموم أوي وغلابة أوي، إتمنيت وقتها لو كنت دكتور أداوي أمراضهم لله وبدون مقابل، إتمنيت كذلك لو كان عندي من المال ما يكفي لجعلهم جميعا أغنياء...إتمنيت أيضا لو كانت قبضتي من فولاذ لأقضي بها على كل فساد أوصل أهل بلدي لما قد وصلوا إليه من سوء الأحوال، كل الأحوال.

سيدة مسنة بالكاد تقوى على الحركة، يسير بجوارها إبنها الشاب المعاقة ساقيه في محاولة مضنية منهما لإيقاف تاكسي...، عجوز يتعكز على عصاه بينما قد أحنى ظهره الدهر... أناس في عمر الشباب من ثقل الهم أضحوا شياب.

لم أسر لرؤية شيء، أي شيء، حتى الآن... تملكني شعور بمزيج من الألم والعجز والحسرة، حل محل نشوة زيارة الوطن...

إشتريت التذكرة وكان 18 هو رقم مقعدي، ووقفت في إنتظار مجيئ السوبر جيفت...

هنا وهناك

To Be Continued...